Kryeministri Edi Rama deklaroi sot se turizmi këtë vit do të jetë i fokusuar te shqiptarët dhe se brenda muajit maj synojmë të hapim të gjitha rrugët për ta. Gjatë një komunikimi live lidhur me masat që po ndërmerren në situatën, Kryeministri Rama u shpreh se “ne duam ti qëndrojmë objektivit që brenda majit të mund ti hapim të gjitha rrugët për shqiptarët. Kur them për shqiptarët, kam parasysh shqiptarët e Shqipërisë, Kosovës dhe kudo ku ata jetojnë”, u shpreh Rama. Hapja e rrugëve, tha ai, do të jetë edhe në funksion të turizmit.
“Turizmi i këtij viti do të jetë i fokusuar te shqiptarët. Sigurisht me shpresën që nuk do të kujtohen për Suedinë vetëm kur bëjnë komente cinike dhe flasin se si ajo nuk u mbyll, por do kujtohen e sillen si suedez, në kushtet e hapjes dhe do të zbatojnë ato rregulla që i dinë përmendësh”, deklaroi Kryeministri.
Më tej, ai informoi se linjat ajrore do të jenë të mbyllura në zonën e Shengenit deri më 15 qershor, ndërsa disa vende kanë deklaruar se do ti hapin më shpejt fluturimet. Por, shtoi Kryeministri, ne kemi një korridor fluturimesh me Air Albania, por rezervimi është i vështirë për shkak se vendet ezaurohen me shpejtësi sapo hapet portali, për shkak të kërkesave të larta.
