Dy turistë belgë janë shpëtuar pas 5 orësh kërkime në kanionet e Gjipesë. Vizitorët e huaj ishin bllokuar gjatë eksplorimit dhe për shkak të terrenit të vështirë nuk kishin mundur të dilnin.
Policia së bashku me ekipet e emergjencës ka nisur menjëherë kërkimet, ku ka mundur t’i gjejë. Dy turistët nuk kanë pasur asnjë shenjë prej të lënduarish dhe gjendja e tyre shëndetësore është paraqitur e mirë.
“Lokalizohen dhe nxirren nga kanioni, pas 5 orësh kërkimesh në një terren shumë të vështirë dhe të rrezikshëm, të dy turistët në gjendje të mirë shëndetësore.
Mbrëmjen e djeshme, shërbimet e Stacionit të Policisë Dhërmi morën njoftim se 2 turistë belg, duke eksploruar kanionin e Gjipesë, Himarë, kishin mbetur të bllokuar për shkak të terrenit të vështirë dhe e kishin të pamundur të dilnin nga kanioni.
Menjëherë pas njoftimit, në drejtim të kanionit janë nisur shërbimet e Policisë, së bashku me shërbimet zjarrfikëse. Si rezultat i kërkimeve, u bë i mundur lokalizimi dhe nxjerrja nga kanioni, e 2 turistëve, të cilët janë në gjendje të mirë shëndetësore. Policia e Vlorës vijon të jetë maksimalisht e angazhuar për të garantuar sigurinë e turistëve dhe vizitorëve që zgjedhin vendin tonë, gjatë gjithë vitit.”
