Pas 6 vitesh në arrati, autoritetet greke kanë vënë në pranga në qytetin e Pireut Ardian Ahmetajn, 51 vjeç, një nga autorët e dyshuar të vrasjes së Besnik Hidës, ngjarje e ndodhur në Lushnjë në vitin 2019. Sipas hetimeve, Ahmetaj e kreu këtë vrasje në bashkëpunim me Laert Haxhiun dhe Orgest Bilbilin, të dy të njohur për përfshirje në grupe kriminale.
Ahmetaj, i konsideruar me rrezikshmëri të lartë shoqërore dhe anëtar aktiv i një grupi kriminal, ishte shpallur në kërkim ndërkombëtar. Gjykata e Fierit, në vitin 2023, kishte caktuar ndaj tij masën e sigurisë “arrest në burg”, për akuzat e “vrasjes me dashje, kryer në bashkëpunim” dhe “mbajtjes pa leje të armëve të zjarrit dhe municioneve”.
Operacioni për kapjen e tij u realizua në kuadër të aksionit ndërkombëtar “The Wanted”, falë bashkëpunimit mes Interpol Tiranës dhe Interpol Athinës, si dhe shkëmbimit të informacionit në kohë reale mes policisë shqiptare dhe asaj greke.
Ardian Ahmetaj, me precedentë të rëndë penalë dhe lidhje të ngushta me botën e krimit, pritet të ekstradohet së shpejti në Shqipëri për t’u përballur me drejtësinë për rolin e tij në atentatin mafioz ndaj Hidës.
