4 shqiptarët e arrestuar në Serbi, pasi akuzohen për nxitje të urrejtjes dhe tolerancës kombëtare, pasi përdorën simbole të Shqipërisë së Madhe, pritet të lirohen. Lajmi është bërë i ditur nga socialisti Taulant Balla. Ky i fundit sqaroi se pritet që ata të lirohen menjëherë, ndërsa hetimet ndaj tyre do të vijojnë në gjendje të lirë.
Rasti ka tërhequr vëmendje pas arrestimit të katër shqiptarëve nga autoritetet serbe, të cilët akuzohen për “nxitje të urrejtjes dhe intolerancës kombëtare, racore dhe fetare”, një vepër penale e parashikuar në legjislacionin e vendit. Sipas njoftimeve zyrtare, në pranga kanë përfunduar katër persona të moshave të ndryshme, të identifikuar me inicialet A. S., E. V., E. G. dhe A. C.
Ngjarja lidhet me publikimin e një videoje në rrjetet sociale, ku ata shfaqen duke udhëtuar me automjet në një autostradë në Serbi, ndërsa mbanin veshje me mbishkrime nacionaliste dhe, sipas autoriteteve serbe, përdornin gjuhë fyese ndaj shtetit serb. Po ashtu, pretendohet se në video janë shfaqur edhe simbole që lidhen me idenë e “Shqipërisë së Madhe”.
Sipas palës serbe, rrethanë rënduese konsiderohet edhe fakti që videoja është publikuar në një datë përkujtimore të fillimit të bombardimeve të NATO-s, duke e bërë çështjen më sensitive në aspektin simbolik dhe politik.
