Ecuria e sistemit të monitorimit të praktikave të ushqyerjes dhe indikatorëve të rritjes së fëmijëve nga 0-5 vjeç ishte fokusi i takimit mes përfaqësuesve të institucioneve shtetërore shëndetësore dhe shoqërisë civile.
Në një takim të mbajtur në ambientet e “Hotel Tirana” u bënë bashkë ekspertë të Institutit të Shëndetit Publik, përfaqësues nga ministria e Shëndetësisë, të organizatës ndërkombëtare që operon në Shqipëri në drejtim të të drejtave të fëmijëve “UNICEF” si dhe përfaqësues të njësive vendore të Kujdesit Shëndetësor. Specialistët e ISHP-së thonë se “tashmë ky sistem është i qëndrueshëm dhe garanton informacion të vazhdueshëm mbi situatën e ushqyerjes së fëmijëve në Shqipëri bazuar në të dhëna administrative”.
Ajo çka mbetet sfidë sipas tyre është vazhdimi i rregullt i dokumentimit dhe raportimit të indikatorëve të sistemit të monitorimit të ushqyerjes së fëmijëve, përfshirja e të gjitha njësive vendore të kujdesit shëndetësor në raportim si dhe fuqizim i sektorit të monitorim-vlerësimit pranë çdo njësie të kujdesit shëndetësor. Me rëndësi sipas ISHP, mbetet edhe fuqizimi i rolit të Operatorit të Shërbimeve të Kujdesit Shëndetësor në nivel qendror dhe rajonal.
