Një apel rrëqethës për ndihmë u publikua pak ditë më parë nga JOQ ALBANIA. Bëhet fjalë për familjen Drizari nga Tirana, ku mjerimi dhe sëmundja ishin ulur këmbëkryq në shtëpinë ku dëgjoheshin zërat e 5 fëmijëve . Kjo familje përbëhet nga 7 anëtarë, ku kryefamiljari ndodhet në një gjendje të vështirë shëndetësore, pasi është operuar në mushkëri. Ai ka qenë dora e vetme e ndihmës për atë familje, por tashëm ai vuan sëmundjen që nuk e la të mbante të afërmit e tij.
Mirëpo, zemra e madhe e shqiptarëve dhe bamirësia e tyre nuk njeh kufij. Kjo familje, e cila së fundmi po jetonte ditët më të vështira të saj, është ndihmuar nga “Dora Sekrete”, një nismë anonime, e cila synon të promovojë gjestet humanitare të shqiptarëve ndaj njerëzve në nevojë, pa përfshirë propagandën në mes. Anëtarë të kësaj lëvizjeje të cilët kanë vetëm synimin të largojnë varfërinë nga çdo familje shqiptare, kanë dërguar ndihma për pjesëtaret e familjes Drizari.
Me fytyrë të mbuluar, pasi qëllimi është ndihma dhe jo reklama e tyre, ata kanë mbushur jo vetëm shtëpinë e familjes nga Tirana, por edhe shpirtin e tyre, e cila shihet qartë në sytë e fëmijëve. “Dora Sekrete” do vazhdojë të jetë pranë shqiptarëve. Familja Drizari është vetëm një nga copëzat e bamirësisë që kjo lëvizje do u ofrojë gjithë shqiptarëve.
