Liliana Sema, 66 vjeçe, është gjetur e vdekur në shtëpinë e saj në Fier. Gruaja dyshohet se kishte ndërruar jetë dy ditë para se të gjendej nga i vëllai i saj, Baçi Gjoleka, pasditen e djeshme. Ai ka thënë se trupin e të motrës e gjeti të ngrirë nga i ftohti. “Ne e gjetëm të ngrirë nga i ftohti. Ja kishin prerë dritat, kishin 10ditë që ja kishin prerë. Ajo nuk kishte lekë t’i paguante. Unë e gjeta të ngrirë. Doktori tha që ka ngrirë nga i ftohti”, ka thënë vëllai i 66 vjeçares.
Djali i saj, Kushtrim Sema është shprehur se e ëma jetonte në kushte shumë të vështira dhe se mblidhte kanaçe për të jetuar. Ai pretendon se 66 vjeçarja i kishte paguar dritat deri në muajin dhjetor, e megjithatë energjia i ishte ndërprerë. “Më mori kushëriri në telefon, erdha këtu dhe e gjeta mamanë të vdekur. Isha para 10 ditësh këtu dhe bëra sherr për dritat që t’ja linin të paktën të kishte një dritë ndezur. Mami kishte pension, mblidhte kanaçe, punonte edhe te komshinjtë kur kishte. Vuante nga zemra, tensioni. Ajo i ka paguar dritat deri në dhjetor, ata thonë që nuk i ka paguar. Ajo ka vdekur nga i ftohti, ka ngrirë sepse edhe një rezistencë që kishte nuk kishte si ta vinte në punë”, ka thënë për mediat djali i Liliana Semës.
