Regjisori Altin Basha është emëruar drejtori i ri i Teatrit Kombëtar, duke zëvendësuar në këtë detyrë Hervin Çulin.
Këshilli i Ministrave, miratoi sot vendimin për vendosjen e Bashës në krye të Teatrit Kombëtar.
Më herët Basha ishte drejtori i Teatrit Kombëtar Eksperimental “Kujtim Spahivogli”, post nga i cili dha dorëheqjen pasi kandidoi për postin e Drejtorit të Teatrit Kombëtar.
Ai kandidoi për këtë post së bashku me Kiço London, Arben Derhemin dhe Elma Dorezin.
Teatri Kombëtar dhe Teatri Eksperimental u shkatërruan mëngjesin e 20 majit 2020 nga fadromat, të mbështetura nga mbi 400 policë, që nxorrën me dhunë artistët dhe aktivistët, për t’i hapur rrugë një projekti që parashikonte ndërtimin e një teatri të ri dhe të disa kullave pas tij, ndërsa artistët i japin shfaqjet te ArTurbina afër parkut të Liqenit Artificial.
Njoftimi i qeverisë
LIRIMIN DHE EMËRIMIN NË DETYRË TË DREJTORIT TË TEATRIT KOMBËTAR
Në mbështetje të pikës 2, të nenit 100, të Kushtetutës, e të pikës 3, të nenit 9, të ligjit nr.10352, datë 18.11.2010, “Për artin dhe kulturën”, të ndryshuar, me propozimin e ministrit të Kulturës, Këshilli i Ministrave
V E N D O S I:
Z. Hervin Çuli, drejtor i Teatrit Kombëtar, lirohet nga kjo detyrë.
Z. Altin Basha emërohet drejtor i Teatrit Kombëtar.
Ky vendim hyn në fuqi menjëherë dhe botohet në “Fletoren zyrtare”.
