Tregtarët e vegël tek tregu i makinave në Shkozet kanë protestuar sot kundër vendimit të qeverisë sipas të cilit pas 1 janarit 2019 në vend do të lejohen të importohen vetëm mjete të përdorura që plotësojnë standardet “Euro 5” të shkarkimeve në ajër.
Ata kanë bllokuar aksin Nishtulla-Shën Vlash dhe bëjnë thirrje që ky vendim të rishikohet pasi i ka penalizuar.
Tregtarët kërcënojnë se protesta do të përshkallëzohet nëse nuik merret parasysh shqetësimi i tyre. “Nuk hamë dot bukë. Do ta përshkallëzojmë nismën tonë. Deri në fund të muajit ka afat kjo qeveri të shohë këtë vendim”, ishin disa nga thirrjet e tyre.
Sipas tregtarëve kjo duhej bërë në mënyrë graduale vit pas viti. Sipas tyre ministri i Mjedisit Blendi Klosi duhet të heqë mbetjet në Porto Romano dhe të “mos merret me ndotjen e papërfillshme që krijojnë makinat”.
