Fax News ka siguruar draft-raportin e Komisionit të Venecias i cili hedh poshtë paketën e ligjeve që bëjnë për rregullimin e medias online, por ta rishohë pasi vuan paqartësi ligjore si dhe mund të ndikojë në frenimin e fjalës së lirë, ndërsa lidhur me këtë ka reaguar edhe zëdhënësi i Presidentit, Tedi Blushi. Ai e ka konsideruar një vendim të pritshëm për të cilin thotë se ka konfirmuar qëndrimin e drejtë të Presidentit të Republikës Ilir Meta për paketën anti-kushtetuese të ligjeve “anti-shpifje”.
Tedi Blushi shkruan: Ashtu sikundër pritej, Komisioni i Venecias ka konfirmuar qëndrimin e drejtë të Presidentit të Republikës Sh.T.Z Ilir Meta për paketën anti-kushtetuese të ligjeve “anti-shpifje”. Siç është sqaruar edhe me dekretet e Presidentit Meta, këto ligje jo vetëm që nuk janë në harmoni, por bien në kundërshtim me:
Parimet themelore kushtetuese të ndërtimit të një shteti demokratik, sigurisë juridike dhe të proporcionalitetit; Dispozitat kushtetuese që mbrojnë të drejtën e lirisë së shprehjes, të lirisë së shtypit dhe të drejtës së informimit;
Jurisprudencën e Gjykatës Kushtetuese të Republikës së Shqipërisë, vendimet e së cilës përbëjnë norma të detyrueshme për zbatim; Nuk janë në harmoni me standartet e Konventës Evropiane të të Drejtave të Njeriut; Nuk janë në harmoni me jurisprudencën e Gjykatës Europianë të të Drejtave të Njeriut (GJEDNJ) Pa garantuar lirinë e shprehjes nuk ka demokraci dhe nuk mund të ketë çelje të negociatave për anëtarësim. LIRIA DHE PAVARËSIA E MEDIAS E PARA!
