Ministri në detyrë për Punët e Jashtme, Gent Cakaj tha se qeveria shqiptare nuk jep dorëheqjen siç ndodhi në Maqedoninë e Veriut, pasi sipas tij, niveli i përgjegjësive është i ndryshëm. Po sipas Gent Cakës, Bundestagu gjerman ka vendosur kushte, një ndër to reforma zgjedhore. Pa reformën s’mund të ketë zgjedhje, tha ai. Gjatë një interviste në televizionin “Koha” në Kosovë, Cakaj u shpreh se “ne nuk kemi bërë zotime të prera se negociatat do të hapen. Faktori i parë është ky. Ndërsa në rastin e Maqedonisë së Veriut, ajo ka organizuar një referendum për ndryshimin e emrit shtetëror. Bashkimi Evropian dështoi të mbajë një prej premtimeve të tij.
Gazetari: Dhe kryeministri Zaev dha dorëheqje…?
Cakaj: Faktori i parë është rrethanor. Nivelet e përgjegjësive para opinionit të brendshëm janë krejtësisht tjera. Faktori i dytë është strukturor se në Shqipëri nuk ka hapësirë për dorëheqje. Në qëndrimet e Bundestagut, Shqipëria detyrohet për adresimin e rekomandimeve të OSBE/ODIHR për reformën elektorale dhe ne jemi në mes të kësaj reforme. Nuk mund të ketë zgjedhje elektorale në Shqipëri pa mbarim të reformës elektorale. Ne jemi në një situatë kur nuk kemi Gjykatë Kushtetuese funksionale.
Gazetari: Pra janë këto çështje që ju pengojnë të shkoni në zgjedhje dhe po mbani qeverinë në këmbë?
Cakaj: Shqipëria është në mes të një reforme dhe kjo reformë duhet të konsolidojë rezultatet e saj para se Shqipëri të jetë në gjendje për të diskutuar për zgjedhjet e parakohshme. Politikisht, krahasimi me Maqedoninë nuk qëndron./ Mapo
