Policia e Tiranës ka zbardhur ngjarjen e rëndë të regjistruar dy ditë më parë në Kamëz, ku 27-vjeçarja Sibela Abedini u hodh nga tarraca e katit të katërt të pallatit ku banonte me qira.
Nga hetimet e autoriteteve ka rezultuar se e reja e ka ndërmarrë aktin ekstrem, pasi i kishin shpërndarë një foto intime në rrjetin social Tik Tok. Policia vuri në pranga 39-vjeçarin Altin Çoku, si personin përgjegjës për shpërndarjen e asaj fotoje. Mbi të rëndon akuza për veprën penale “Shkaktimi i vetëvrasjes”.
Fillimisht autoritetet raportuan se e reja ishte rrëzuar nga tarraca e ballkonit, por më pas rezultoi se ngjarja nuk ishte aksidentale, por e nxitur pikërisht nga 39-vjeçari.
Policia e ka zbardhur ngjarjen pas dëshmive të familjarëve dhe kqyrjes së telefonit të viktimës. E ndjera i kishte kërkuar disa herë që të fshinte foton nga rrjeti social, por 39-vjeçari herë pretendonte se nuk e kishte publikuar vetë, ndërsa herë të tjera i kërkonte të vijonin lidhjen.
Ngjarja ndodhi pikërisht tek pallati që shihni në foton e mëposhtme, rreth orës 23:00 të së shtunës, në rrugën “Teuta” në Kamëz. 27-vjeçarja pasi u hodh nga kati i katërt i tarracës së pallatit, u transportua me urgjencë në spital, por nuk arriti dot t’u mbijetonte plagëve të marra.
Para ngjarjes të së shtunës dyshohet se vajza kishte tentuar dhe dy herë të tjera vetëvrasjen.
