Ditën e sotme, salla operative e Policisë Kufitare Himarë deklaroi se ka marrë njoftim për 2 turistë amerikanë, të cilët ishin duke lundruar me një mjet lundrues kanoe, në vendin e quajtur “Gjiri i Filikurit” dhe e kishin të pamundur të ktheheshin në breg, pasi ishin bllokuar në shkëmbinjtë, që gjendeshin në atë zonë.
Menjëherë pas marrjes së njoftimit janë organizuar shërbimet e Policisë Kufitare në Dhërmi, për t’iu ardhur në ndihmë 2 turistëve. Shërbimet e Policisë i kanë nxjerrë ata në breg, duke i shoqëruar me mjetin e Policisë Kufitare, dhe aktualisht janë në gjendje të mirë shëndetësore.
Sipas njoftimit, turistët kanë falënderuar shërbimet e Policisë Kufitare, për reagimin e menjëhershëm dhe profesionalizmin e treguar gjatë ofrimit të ndihmës.
Policia e Kufitare e Vlorës është e angazhuar maksimalisht në shërbim të qytetarëve dhe të vizitorëve, për të krijuar një ambient sa më të sigurtë.
Po sot, disa turistë nga Ukraina dhe Bjellorusia kanë mbetur të bllokuar pasdite në malin e Karaburunit mbi zonën e Dukatit. Fillimisht shtetasit e huaj kanë telefonuar emergjencat e shtetit grek për të kërkuar ndihmë.
Mësohet se këta të fundit kanë njoftuar autoritetet shqiptare të cilat sapo kanë marrë telefonatën janë nisur drejt vendngjarjes. Pas disa orësh kërkime, Policia e Shtetit dhe zjarrfikësit kanë bërë të mundur gjetjen e turistëve, duke iu ardhur në ndihmë. Kjo nuk është hera e parë që turistë e huaj humbasin destinacionin, teksa eksplorojnë natyrën dhe malet shqiptare, pasi lëvizin pa guidë vendase.
