Qeveria shqiptare ka nënshkruar disa marrëveshje të rëndësishme me Qeverinë e Emirateve të Bashkuara Arabe, duke theksuar avancimin e bashkëpunimit ndërmjet dy shteteve në fushën e energjisë, teknologjisë dhe infrastrukturës.
Kryeministri Edi Rama njoftoi lidhjen e marrëveshjeve mes kompanive Masdar, TAQA, KESH dhe OST, si dhe nënshkrimin e një letre angazhimi për zhvillimin e Projektit të Qytetit Inteligjent të Shqipërisë, në partneritet me “Presight AI Ltd”.
Ky hap pritet të sjellë mundësi të reja për zhvillimin e sektorëve kyçë dhe avancimin e Shqipërisë drejt një të ardhmeje ku të mbizotërojë teknologjia.
“Shkëmbimi i marrëveshjeve të nënshkruara në kuadër të bashkëpunimit midis Masdar, TAQA, KESH dhe OST, si dhe nënshkrimi i letrës së angazhimit për Projektin e Qytetit Inteligjent të Shqipërisë midis “Presight AI Ltd””, shkruan Rama.
Marrëveshjet e nënshkruara të bashkëpunimit mes palëve, janë:
-Marrëveshja Kuadër për Veprim mes Masdar, TAQA, KESH dhe OST, që u shkëmbyen mes Zëvendëskryeministres dhe Ministres së Infrastrukturës dhe Energjisë Belinda Balluku, si dhe kryetarit të MASDAR Sulltan Al Jaber.
– Letër Angazhimi për Projektin Albania Smart City ndërmjet “Presight AI Ltd” dhe Ministrisë së Brendshme e Republikës së Shqipërisë, të shkëmbyera mes Ministrit të Brendshëm Ervin Hoxha dhe Kryetarit të “Presight AI Ltd” Sulltan Al Jaber.
Marrëveshjet u shkëmbyen në një ceremoni të posaçme në praninë e Kryeministrit Rama dhe Presidentit të EBA Mohamed bin Zayed Al Nahyan.
