Dy persona janë vënë në prangat e policisë dhe një tjetër është shpallur në kërkim pasi bashkëpunoi me 36-vjeçarin Bledar Lloji i ndaluar dy ditë më parë për vjedhjen e një dyqani telefonash.
“Si rezultat i fazës së dytë të operacionit policor të koduar “Electronics” u ndaluan shtetasit A. B., 17 vjeç dhe K. B., 15 vjeç, për veprën penale “Vjedhja”, kryer në bashkëpunim, si dhe u shpall në kërkim shtetasi M. M., 15 vjeç, për të njëjtën vepër penale. “, njofton policia.
Këta shtetas dyshohet se kanë bashkëpunuar me shtetasin Bledar Lloji (i ndaluar dy ditë më parë), për vjedhjen në dyqanin e pajisjeve elektronike, në lagjen “Pavarësia 3”, si dhe kanë tentuar të vjedhin në dyqanin tjetër me pajisje elektronike, në lagjen “Lef Sallata”, Vlorë.
Nga veprimet e mëtejshme hetimore është bërë e mundur zbardhja dhe dokumentimi i 3 rasteve të tjera të vjedhjes, të cilat dyshohet se këta shtetas i kanë kryer në bashkëpunim me njëri-tjetrin, konkretisht: Më datë 31.10.2022, kanë vjedhur një shumë parash, në banesën e një shtetasi, në lagjen “24 Maji”; Më datë 20.08.2022, në lagjen “Isa Boletini”, kanë tentuar ti vjedhin një shumë parash, një shtetasi; Më datë 18.10.2022, në lagjen “Rilindja”, Vlorë, kanë tentuar të vjedhin në banesën e një shtetaseje.
Për shkak se dy shtetasit janë të mitur identitet nuk bëhen publike. Burimet e policisë së Vlorë konfirmojnë se Bledar Lloji është personi i cili ka rekrutuar edhe të rinjtë për vjedhjet e bëra dhe i ka mësuar këta të fundit.
Madje nga policia konfirmohet se Bledar Lloji personi i arrestuar nga gjurmët që kishte lënë në dyqanin elektronik në lagjen Pavarësia është edhe personi që pas arrestimit i ka treguar dy të miturit në polici që më pas është bërë arrestimi tyre.
Materialet i kaluan Prokurorisë Vlorë, për veprime të mëtejshme.
