I kamufluar si motorist që shpërndan pica, ekzekutori i biznesmenit 56-vjeçar, Bujar Nasufi, ka pritur derisa bashkëshortja e viktimës ka dalë nga makina për ta qëlluar për vdekje.
Viktima mësohet se ishte larguar nga mobileria e tij në rrugën “Irfan Tomini” rreth orës 20:20 me automjetin e tij tip Benz ngjyrë gri dhe ka shkuar në drejtim të banesës në rrugën “Myrte Zeneli”.
Autori i maskuar, i cili po e ruante dhe priti deri sa bashkëshortja e 56-vjeçarit zbriti nga makina, e qëlloi ndërsa viktima po parkonte.
Drejt Bujar Nasufit u qëlluan 6 plumba nga një distancë e afërt, dy prej të cilave rezultuan fatale për jetën e biznesmenit.
Pista kryesore që po heton policia është ajo e konflikteve për pronat, pasi viktima nuk njihej si njeri problematik dhe s’kishte precedentë penalë.
Mësohet se familja Nasufi, me origjinë nga Berati, jetojnë prej kohës së diktaturës në zonën e Selitës së vogël dhe përbëhej nga 5 vëllezër, pronarë të disa bizneseve në rrugën “Irfan Tomini”.
Familjarët kanë deklaruar se pronat janë ndarë që herët dhe s’ka pasur probleme mes vëllezërve.
