Të tjera detaje kanë dalë nga ngjarja e rëndë që tronditi mesditën e djeshme qytezën e Orikumit, ku një burrë vrau bashkëshorten e tij dhe më pas i dha fund jetës me armë zjarri.
Sipas informacioneve nga familjarë të çiftit, ngjarja ka ndodhur rreth orës 13:30 në banesën trekatëshe të çiftit Llogora Xhevroj dhe Sose Xhebroj. Dy fëmijët e familjes, të moshës 16 dhe 19 vjeç, pasi janë përpjekur disa herë të kontaktojnë nënën e tyre në telefon pa marrë përgjigje, janë nisur drejt banesës së bashku me dy shokë.
Fillimisht, djali i madh ka hyrë në banesë dhe në katin e tretë të banesës ka gjetur nënën e tij, Sose 48-vjeçe, pa shenja jete. Mësohet se në qafë ajo kishte një fashetë dhe ishte e gjakosur. Dyshohet se ajo ishte mbytur me këtë fashetë të lidhur rreth qafës, Menjëherë, djali i madh ka njoftuar vëllanë e tij, i cili ndodhej në makinë me dy shokët, dhe më pas kanë lajmëruar ambulancën e Orikumit.
Ambulanca ka mbërritur në vendngjarje dhe ka transportuar trupin e pajetë të gruas drejt Spitalit të Vlorës, ku mjekët kanë konfirmuar vdekjen e saj.
Mësohet se edhe dy djemtë kanë shoqëruar ambulancën me trupin e pajetë të nënës së tyre. Ndërkohë, gjatë kohës që ata ndodheshin në banesë, babai i tyre kishte kryer vetëvrasje në garazh, pa dijeninë e djalit të madh. Autoritetet kanë nisur hetimet për të zbardhur plotësisht rrethanat e kësaj tragjedie familjare. Ndërkohë, varrimi i dy viktimave pritet të kryhet ditën e nesërme.
