Mapo.al zbardh detaje të reja nga vrasja e ish-oficerit të policisë Arben Bilali javën e kaluar në zonën e Selitës në Tiranë. Në automjetin tip “Mercedes Benz CLS” me targa të falsifikuara, i cili u gjet i braktisur nga policia pas ngjarjes në një lagje të Saukut, mësohet se janë gjetur gjurmë të vrasësve.
Ata braktisën automjetin pasi kanë hasur në një patrullë policie dhe janë larguar në këmbë. Dy persona mendohet të kenë qenë në rolin e “killerave”, ndërsa në drejtim të Bilalit është qëlluar nga ana e pasagjerit, pas shoferit.
Burime për Mapo.al thanë se në dyert e makinës janë konstatuar gjurmë të cilat mund të ndihmojnë grupin hetimor në identifikimin e autorëve të atentatit.
Mostrat e gjetura janë dërguar në laboratorin shkencor të Policisë së Shtetit dhe pritet që brenda pak ditësh ekspertët të kenë një identikit të qartë për profilin e vrasësve.
Arben Bilali, ish-efektiv i komisariatit nr.2 në kryqytet dhe ish-pjesëtar i Forcave të Ndërhyrjes së Shpejtë, u ekzekutua me 14 plumba mesditën e të mërkurës të javës së kaluar pranë banesës së tij. Ngjarja dyshohet për motive hakmarrje. Kjo pasi familja e Bilalit ka qenë në konflikt me dy familje të tjera në kryeqytet, përplasje të cilat kanë prodhuar disa të vrarë. Mes të cilëve edhe dy vëllezër të Bilalit të ekzekutuar në 1997 dhe 2010 në po të njëjtën zonë, atë të Selitës, ku u qëllua për vete edhe ish-oficeri i policisë.
