Dy vite pas vrasjes së dyfishtë në Malësi të Madhe të Vilson Çutajt dhe Kelment Pepajt, policia e Shkodrës ka arrestuar autorin e dyshuar të ngjarjes, 27-vjeçarin Danjel Pepaj.
I riu është ndaluar pasi ishte shpallur në kërkim për vrasjen e dyfishtë që tronditi vendin. Ndaj tij, gjykata e Shkodrës ka dhënë edhe masën e sigurisë arrest me burg.
Vrasja e dy të rinjve ka ndodhur më 3 tetor të vitit 2020. Fillimisht ata u denoncuan të zhdukur nga të afërmit e tyre, por pas kërkimeve të kryera, u gjetën trupat e pajetë të Pepajt dhe Çutajt.
Nga hetimet e kryera asaj kohe, rezultoi se autor i vrasjes së dyfishtë ishte Danjel Pepaj, i cili i ka qëlluar me armë pas një konflikti që patën në fshatin Bajzë të Shkodrës.
Shkak i konfliktit u bë një sasi kanabisi. Të rinjtë kultivonin lëndë narkotike në një zonë malore pranë fshatit Vrith.
Për të sqaruar sherrin Danjel Pepaj, Klement Pepaj dhe Vilson Çutaj, shkuan të sqaroheshin tek parcelat e kanabisit që kishin mbjellë në mal. Por, sqarimi mes tyre, përfundoi në tragjedi.
Danjel Pepaj u hakmor ndaj Vilsonit dhe Klementit, pasi këta të fundit e kishin dhunuar më parë në fshatin Bajzë. Trupat e pajetë të Klement Pepaj dhe Vilson Çutaj u gjetën 300 metra larg parcelës me kanabis të mbjellë nga Danjel Pepaj.
Njoftimi i policisë për arrestimin e 27-vjeçarit:
Finalizohet operacioni policor i koduar “Vrith”, për kapjen e një personi në kërkim, me rrezikshmëri të lartë shoqërore.
Vihet në pranga 27-vjeçari, për vrasje të dyfishtë me armë zjarri.
Shërbimet e Komsiariatit të Policisë Malësi e Madhe, në bashkëpunim me Forcën Operacionale të DVP Shkodër, ndaluan shtetasin:
-D. P, 27 vjeç, banues në fshatin Vrith, Malësi e Madhe.
Ky shtetas ishte shpallur në kërkim, pasi Gjykata e Shkodrës i ka caktuar masën e sigurisë “Arrest në burg”, për veprat penale “Vrasja me paramendim”, e kryer në bashkëpunim”, “Mbajtja pa leje e armëve, armëve shpërthyese dhe municionit luftarak” dhe “Kultivimi i bimëve narkotike”.
27-vjeçari dyshohet se në fshatin Vrith, më datë 03.10.2020, ka vrarë me armë zjarri, shtetasit V. Ç. dhe K. P.
Materialet i kaluan Prokurorisë pranë Gjykatës së Rrethit Gjyqësor Shkodër, për veprime të mëtejshme.
