Gjykata e Lezhës ka dënuar me 8 vite burg, 17-vjeçarin Florian Përvathi për vrasjen për gjakmarrje të bashkëfshatarit të tij, Lek Lekgjonaj.
I riu u dënua për veprat penale “Vrasje për gjakmarrje” dhe “Mbajtja pa leje e armëve dhe municioneve luftarake”. I mituri u dënua me 12 vjet burg pasi është i mitur nën 18 vjeç. Por për shkak të gjykimit të shkurtuar dënimi i tij u ul me 1/3 në 8 vjet.
Prokuroria bazuar në rrëfimin e 17-vjeçarit tha se ai e ka kryer krimin me paramendim, për gjakmarrje, pasi vëllai i viktimës i kishte vrarë babanë në vitin 2009, kur ai ishte vetëm 4 vjeç.
Gjithashtu u zbulua se i riu e kishte siguruar pistoletën një vit më parë.
Avokati mbrojtës nuk e kundërshtoi vendimin e gjykatës.
Florian Përvathi ekzekutoi me armë zjarri bashkëfshatarin e tij Lek Lekgjonaj, mesditën e 24-janarit të këtij viti në fshatin Manati të Lezhës, sapo viktima kishte hyrë me makinë në oborrin e shtëpisë së vëllait të tij. Menjëherë pas krimit ai u vetëdorëzua në polici duke pranuar autorësinë dhe treguar dhe motivet e ngjarjes.
