Një paciente e moshuar ka rënë pre e vjedhjes në ambientet e jashtme të një prej spitaleve të QSUT, teksa ka qenë në radhë për të marrë shërbim. Ajo ka treguar se vinte nga Durrësi dhe në portofol kishte paratë, kartën ID dhe çdo dokument tjetër.
“Në datën 6 isha këtu. Ishte radhë e madhe. Isha e sëmurë nuk mund të hyja dot. Më shtynë dhe më morën 10 mijë lekë, kartë identiteti çdo gjë. Më morën portofolin me çdo gjë”, ka thënë ajo.
E moshuara ka ardhur përsëri në QSUT për të bërë konsultat dhe analizat e nevojshme, dhe aty i ka treguar gazetares historinë e saj. Pyeta policin thotë ajo, nëse kishte kamera për të gjetur hajdutin por ai i ka thënë se ishte i pamundur identifikimi.
Në këto kushte, pacientja e moshuar ka treguar se kanë qenë mjekët ata që e kanë ndihmuar të kthehej në shtëpi, në Durrës. “Më dha doktoresha 500 lekë dhe një doktor më dha 300 lekë që ika në Durrës”, është shprehur ajo për Ora News.
