Ambasadorja e SHBA-së, Yuri Kim u ka bërë thirrje përsëri Presidencës, Parlamentit dhe institucioneve të drejtësisë që të vazhdojnë të punojnë me urgjencë për funksionimin e Gjykatës Kushtetuese. Ajo thekson se vetëm 6 javë kanë mbetur deri në fund të vitit, dhe se Kushtetuesja lë të kuptohet se duhet të ngrihet brenda 2020-tës.
“Është mirë të shoh progresin drejt funksionimit të Gjykatës Kushtetuese deri në fund të këtij viti. 6 javë të mbetura, Presidenca, Parlamenti dhe institucionet e drejtësisë duhet të vazhdojnë të punojnë me urgjencë. Faleminderit JAC për sigurimin e kandidatëve të kualifikuar. Udhëheqësit duhet të përmbushin premtimin e Shqipërisë për drejtësi!”, shkruan Kim në postimin e saj.
Kim risjell në vëmendje një postim të saj me 19 Tetor, pasi Presidenca dhe Parlamenti publikuan listat e tyre përkatëse të kandidatëve për anëtarë të Gjykatës Kushtetuese.
