Ministrja e Infrastrukturës dhe Energjitikës Balinda Balluku ka emëruar drejtorin e ri të OST-së. Pas dorëheqjes së drejtorit të deritanishëm Klodian Gradeci, për shkak të skandalit me kompaninë DH-Albania, duket se për qeverinë janë trazuar mjaft ujërat.
Vendin e Gradecit në krye të OST-së do ta marrë Skerdi Drenova, një nga ish zv.drejtorët e rëndësishëm të Televizionit Top Channel i cili pas dorëheqjes nga gjiganti mediatik, në vitin 2015 u emërua nga kryebashkiaku Veliaj në krye të INUV.
Tashmë, Drenova do të mbajë postin e drejtorit të OST, që u përfshi në skandalin e DH Albania, një kompanie fantazmë, tenderin prej 12 mln eurosh për një linjë energjitike, tender që tashmë është anulluar.
Top Channel duket se është kthyer në një trampolinë për drejtorët, të cilët kapin poste të rëndësishme në administratën shtetërore.
LETRA e dorëheqjes së Gradecit:
Drejtuar: Z.Pajtim Bello, Kryetar i Këshillit Mbikëqyrës të OSHT SHA
I nderuar Z.Kryetar,
Unë i nënshkruari Klodian Gradeci, që nga data 21.09.2017 mbaj detyrën e Administratorit të OST sh.a.
Nëpërmjet kësaj kërkese, po ju paraqes dorëheqjen time të parevokueshme nga ky funksion që unë mbaj pranë shoqërisë “OST” sha, për arsye personale, duke filluar nga dt.21.01.2019.
Gjatë kësaj periudhe që kam punuar pranë shoqërisë, kam pasur mundësinë që të kontribuoja sado pak në ngritjen e saj, duke punuar me një staf të përkushtuar dhe bashkëpunues, ku së bashku kemi arritur rezultate mjaft të mira për shoqërinë.
Duke ju falënderuar paraprakisht Juve dhe stafin e OST sha.