Presidenti i Rusisë Vladimir Putin, u ka dërguar telegrame presidentit të SHBA-së, Donald Trump dhe kryeministrit të Britanisë, Boris Johnson, duke thënë se duhet rindezur bashkëpunimi që këto shtete kanë pasur gjatë Luftës së Dytë Botërore për t’i zgjidhur problemet e sotshme. Kjo nismë e Putinit është e fundit nga një sërë kontaktesh me Washingtonin, me të cilin Moska dëshiron të përmirësojë marrëdhëniet e ngatërruara rreth shumë çështjeve, prej akuzave për sulm kibernetik në zgjedhjet e SHBA-së e deri te lufta në Siri, shkruan Reuters.
Putini ua dërgoi telegramet dy aleatëve të Luftës së Dytë Botërore në 75-vjetorin e përfundimit të saj. Rusia, e cila shënon dorëzimin pakusht të Gjermanisë naziste më 9 maj, është detyruar të zvogëlojë festimet për shkak të koronavirusit. Në mesazhin për Trumpin, Putini tha se Rusia dhe SHBA-ja ndodheshin para sfidave të përbashkëta globale. “Shtetet tona mund të bëjnë shumë për të siguruar siguri dhe stabilitet ndërkombëtar”, ka thënë Putin. Putin i tha kryeministrit britanik, Johnson, se uniteti i aleatëve gjatë Luftës së Dytë Botërore është i nevojshëm edhe sot, dhe se kujtimi i atyre viteve duhet të ndihmojë në përmirësimin e lidhjes mes shteteve.
