Ditën e sotme presidenti Ilir Meta ka dekoruar këngëtarin e muzikës popullore Ylli Baka me titullin “Mjeshtër i Madh”. Kreu i Shtetit e dekoroi atë për motivacionin: “Me mirënjohje për përpjekjet e suksesshme dhe arritjet e shquara në prezantimin dhe ngritjen në një nivel të ri të këngës popullore e në veçanti të Jugut të Shqipërisë, si dhe për përfaqësimin dinjitoz të saj brenda dhe jashtë vendit.
Për kontributin e shquar në fushën e kulturës, në interpretimin e rrallë të këngës popullore, por edhe në mbrojtjen e promovimin e trashëgimisë kulturore shqiptare si pjesë e fondit të artë të Folklorit Kombëtar”. Në rrjetet sociale Meta shkroi se Baka nuk ka nevojë për prezantim pasi ai njihet nga të gjithë dhe se ai ka fituar me meritë të gjitha duartrokitjet që ka marrë. Ai gjithashtu shtoi se këngëtari është bërë i pandashëm për shqiptarët në të gjitha gëzimet e tyre familjare.
