Mosmarrëveshje mes deputetëve demokratë të opozitës së re, teksa në grupin e tyre parlamentar dukshëm ka patur përplasje. Të paktën këtë të lë për të kuptuar reagimi i Rudina Hajdarit, e cila është shprehur se nuk e njeh vendimin që ka marrë dhe përcjellë këtë të hënë një sërë prej deputetëve demokratë të opozitës së re.
Sot njëri prej deputetëve, Korab Lita, njoftoi se do të ishte ai drejtuesi i ri i grupit parlamentar, por në një reagim për abcnews, Rudina Hajdari u shpreh se ajo nuk është larguar nga drejtimi i grupit dhe se për ta bërë këtë do duheshin vota dhe jo “dëshira e disa individëve”. Më tutje Hajdari reagoi dhe në rrjetin social duke thënë se është ajo drejtuesja e grupit parlamentar të PD-së.
Mbetet ende e paqartë se çfarë ka ndodhur konkretisht mes demokratëve të opozitës së re, por duket se mosmarrëveshjet dhe zënkat kanë filluar prej kohësh.
