Sekretari i Përgjithshëm i foltores Flamur Noka, ka shkaktuar një incident në disa zona votimesh në Elbasan. Sipas policisë së Elbasanit, rreth orës 17:00 është njoftuar se deputeti demokrat Flamur Noka ka ofenduar komisionerët në një qendër votimi në fshatin Kuqan. Po sipas policisë, në një tjetër qendër, atë të fshatit Shirgjan, Noka ka tentuar të shtyjë kutitë dhe është larguar.
Mësohet se Noka u paraqit pranë qendrës në dhomën e votimit në orën 16:46 duke shkaktuar presion dhe debat me tone të larta, të bërtitura dhe intimiduar anëtarët e komisionit dhe vëzhguesit. Gjatë debatit, ai është konfliktuar edhe fizikisht çka ka detyruar thërritjen e policisë. Në njoftim thuhet se komisionerët nuk kanë kërkuar ndërhyrjen e policisë dhe menjëherë pas marrjes së njoftimit, policia e Elbasanit ka njoftuar prokurorinë. Autoritetet po vijojnë verifikimet për rastin në fjalë.
“Më datë 14.05.2023, rreth orës 17:00, Policia është njoftuar se në Qendrat e Votimit të fshatrave Kuqan dhe Shirgjan, drejtuesi politik i koalicionit “Bashkë Fitojmë“, deputeti Flamur Noka ishte futur në QV-në e fshtatit Kuqan dhe ka ofenduar komisionerët, ndërsa në qendrën e votimit në Shirgjan ka tentuar të shtyjë kutitë dhe është larguar.
Nga ana e komisionerëve nuk është kërkuar ndërhyrja e Policisë. Në lidhje me njoftimin e marrë, është njoftuar menjëherë Prokurori. Nga ana e Policisë, në drejtimin e Prokurorisë, po vijojnë veprimet verifikuese dhe procedurale në lidhje me të dyja rastet”, thuhet në njoftimin e Policisë së Elbasanit.
