Tashmë është zyrtare.
Alexis Sanchez bëhet futbollisti më i ri i Interit. Konfirmimi ka ardhur nga faqja zyrtare e klubit zikaltër, me kilianin që firmos për një vit në formulën e huazimit nga Manchester United. 30 vjeçari gjendej prej së mërkurës në Milano, por vetëm sot ka ardhur zyrtarizimi.
Sipas “Tuttomercatoweb”, agjenti i tij gjithashtu pranoi një kontratë dy-vjeçare nga viti 2020-2022, megjithëse ende nuk është nënshkruar. Për kartonin e Sanchez, Inter mund të shpenzojë rreth 15 milionë euro në merkaton e ardhshme të verës, periudhë kur edhe i mbaron huazimi nga “djajtë e kuq”. Ndërkohë, rroga prej 12 milionë euro do të paguhet nga të dy klubet, me zikaltërit që do paguajnë vetëm 5 milionë euro.
Ky është një rikthim në Itali për 30 vjeçarin Sanchez, i cili së pari u bashkua me Udinese në vitin 2007 dhe u transferua te Barcelona për 26 milionë euro në verën e vitit 2011. Gjatë eksperiencës me bardhezinjtë, ai grumbulloi 95 takime, duke shënuar 20 gola dhe dhuruar 16 asiste. Në karrierën e tij, Sanchez ka veshur edhe fanellat e Barcelonës e Arsenalit.
