Kryetari i grupit parlamentar të PS-së Taulant Balla tha se operacioni humanitar do të vijojë deri në fund të kësaj lufte në qarkun e Elbasanit. Balla shprehet se “bashkë me kryetarin e bashkisë Andis Salla dhe deputetin Luan Duzha ishim sot në qendrën e paketimit dhe shpërndarjes së pakove ushqimore në qytetin e Cërrikut, prej ku filluan të shpërndahen për familjet në nevojë 1 200 pako ushqimore”.
“Pjesa e parë e operacionit humanitar në këtë bashki u krye me ndihmën e organizatave, bizneseve, kontributeve individuale, ndërsa do të vijojë puna edhe më tej për t’ju gjendur çdo familje në nevojë, por edhe çdo të moshuari të vetmuar me shërbimet që ka nevojë. Pakot ushqimore që po shpërndahen sot janë blerë sipas procedurave të përcaktuara nga Qeveria bazuar në Fondin e Emergjencave Civile të bashkisë Cërrik. Janë pako të plota ushqimore të cilat përmbajnë të gjitha produktet e domosdoshme për një familje”, tha Balla.
Po ashtu Balla shtoi se “vendimi i Qeverisë ka përcaktuar qartë cilat janë familjet që përfitojnë. Ndërkohë në Cërrik edhe procesi i shpërndarjes së ndihmës ekonomike të dyfishuar për shkak të luftës ka përfunduar. Dua t’u them të gjithë atyre që këtë situatë lufte e shohin nga divani, se ky operacion humanitar, i cili u ka ardhur në ndihmë rreth 200 mijë familjeve në të gjithë Shqipërinë, është një detyrim që qeveria ka ndaj atyre që sot janë në nevojë”.
