55-vjeçari nga Vlora kapet me 53 500 € të padeklaruara në kufi
Një 55-vjeçar nga Vlora është proceduar penalisht pasi tentoi të nxirrte jashtë Shqipërisë një shumë të madhe parash pa e deklaruar. Ngjarja u zbulua nga shërbimet e Policisë Kufitare gjatë një kontrolli në dalje të territorit shqiptar.
Në çantën e shtetasit me inicialet A. Xh. u gjetën 53 500 euro, të cilat ai nuk i kishte deklaruar sipas detyrimeve ligjore. Menjëherë pas konstatimit, specialistët e Hetimit të Krimeve në Drejtorinë Vendore të Kufirit dhe Migracionit Gjirokastër sekuestruan shumën e parave në cilësinë e provës materiale.
Ndaj 55-vjeçarit nisi procedimi penal në gjendje të lirë për veprën penale “Mosdeklarimi në kufi i të hollave dhe sendeve me vlerë”.
Materialet i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër, ndërsa hetimet vijojnë për të dokumentuar plotësisht rastin dhe burimin e shumës së sekuestruar.
