I pyetur nga gazetarët nëse qeveria po mendon një mbyllje të dytë të vendit për shkak të rritjes pa kontroll të shifrave të infektuarve dhe vdekjeve, kryeministri Rama është shprehur se asgjë nuk është jashtë parashikimeve. Sipas tij derimë tani është ndjekur strategjia e sugjeruar nga komiteti Teknik i ekspertëve, çka ka funksionuar. Kryeministri ka folur dhe rreth testeve të shpejta dhe pse nuk po aplikohen në vend. Gjithashtu Rama ka shpjeguar që numri i testeve të përgjithshëm të referuar në publik është numri i testeve të bëra në institucionet shtetërore, jo private,
“Së pari asgjë nuk është jashtë parashikimeve, ne kemi një strategji vjeshte dimër e shkruar zeza mbi të bardhë. Manastirliu ka folur pa pushim për rrezikun e madh të valës së dytë për shkak të relaksimit në përballjen pasi u kalua një fazë e ndërmjetme ku faktikisht gjërat u dukën sikur po shkonin drejt normalitetit.
Ajo që dua tju them me bindje se po bëjmë gjithçka dhe askush tjetër spo bën më shumë. Dhe është fatkeqësi e madhe që një parti që pretendon që do bëhet shumicë dhe do të qeverisë vendin pas 25 prillit dhe që u lajmërua nga kryetari i PD në dilemën e tij mes shifrave dhe që përsërit çdo ditë që spitale janë në kolaps që nuk bëhen teste që duhet të bëhet ajo dhe kjo, thua që është i autorizuar nga ndonjë mandat eksperti është shumë e dëmshme sepse spitalet janë shumë larg të qënurit në kolaps. Është hapur Covid 3 dhe është gati Covid 4.
Kam pasur një bisedë të gjatë shteruese me ekspertët e komitetit teknik dhe është e nevojshme të mësohet se ne nuk i numërojmë testet që bëhen në privat përveçse ato pozitivet, por numri i testeve të përgjithshëm është vetëm ai i bërë në institucionet publike dhe ne nuk bëjmë teste të shpejta jo se nuk i gjejmë dot por është parë nga ekspertët për të bërë testet jo të këtij lloji, por dhe testet e shpejta do të hyjnë së shpejti. Unë kam besim absolut tek ata njerëz dhe kam mundur të shoh vazhdimisht se fjala e tyre ka dalë”, tha Rama.
