Kreu i qeverisë Edi Rama u pyet nga gazetarët lidhur me zgjedhjet në SHBA, ku preferoi që të mos bënte asnjë diferencim mes kandidatëve, për të cilët tha se i kishte të dy miq. Rama tha se nëse gazetarët do e kishin pyetur për Lulzim Bashën dhe për Monika Kryemadhin, ai padyshim të preferuarin e tij ka kreun e PD-së, por mes Biden dhe Trump nuk mund të zgjedhë pasi i ka miq të dy.
“Nëse më pyesni për preferencën mes Lulzim Bashës dhe Monikës, mund t’iu them pa hezitim që më pëlqen Lulzim Basha, po që të më çoni në Amerikë dhe të më kërkoni mendim për dy njerëz që i kam shumë miq të dy sikur nuk shkon. Për Monikën dhe Lulzim Bashën, dihet që kam mik Bashën”, u shpreh Rama.
Rama duket se ka reflektuar pas katër vitesh, pasi në 2016 ai do të bënte një deklaratë të çuditshme, kur thoshtë ”larg qoftë” nëse Trump do të vendosej në krye të SHBA-ve, në një deklaratë për CNN. “Larg qoftë! Besoj se do të dëmtonte shumë SHBA-në dhe do të dëmtonte shumë botën demokratike, pasi ai, në fund të ditës do të duhet të bënte disa prej gjërave që po thotë se do të bëjë dhe pa dyshim, kjo do të ishte shumë e dëmshme.
Gjithashtu, shpresoj që ndërkohë ai të jetë në gjendje të mësojë më shumë mbi botën, të mësojë më shumë mbi myslimanët, të mësojë më shumë se si ka shumë njerëz, që pavarësisht besimit apo etnisë së tyre, jetojnë me krenari me vlerat që Amerika përfaqëson dhe i mbrojnë këto vlera, edhe përmes sakrifikimit të fëmijëve të tyre, në luftërat që bëjnë përkrah Amerikës”, shprehej Rama asokohe.
