Ministrja Manastirliu po ndjek nga afër procesin e vaksinimit të mësuesve. Vaksina Astra Zeneca që po shkakton kaq shumë debate në botë mbi sigurinë e saj dhe ku shumë vende të BE e kanë pezulluar deri në një vendim të dytë nga EMA apo dhe OBSH, po vazhdon t’u injketohet mësuesve.
Duke folur para mediave, Manastirliu ka zbuluar se përqindja e mësuesve që kanë refuzuar të bëjnë vaksinën nuk është në nivele aq të larta sa të shkaktojë “alarm”.
“Nuk ka pasur përqindje që të na alarmojë pasi bëhet një epikrizë dhe vlerësim paraprakisht para se të kryejnë vaksinën. Pra shihet gjendja shëndetësore, si është gjendja e mësuesit që duhet të bëjë vaksinën, jepet rekomandimi nga mjeku përkatës nëse klasifikohet për të bërë vaksinën, nëse heziton ta bëjë vaksinën dhe do ta bëjë në një moment të dytë, thjesht përshkruan në formular arsyen dhe më pas rivlerësohet në një moment të dytë. Vaksina nuk është e detyrueshme, por e këshillueshme për t’u bërë pasi shpëton jetë”, tha Manastirliu.
Ministrja shtoi se vaksinimi i mësuesve është i nevojshëm pasi janë kategori e riskuar. Vaksina anti Covid mund të lehtësojë masat dhe të bëjë të mundur rikthimin e nxënësve në shkolla sa më shpejt.
“Procesi i vaksinimit të mësuesve në Fier ka nisur sic ka nisur në të gjithë vendin. Janë vaksinuar 2664 mësues deri ditën e djeshme, ndërkohë që sot vijon të vaksinohet në të gjithë Shqipërinë. Janë më shumë se 45 shkolla, të cilat janë aktivizuar në këtë proces. Kemi bërë një ndarje territoriale në mënyrë që qendra shëndetësore së bashku me mjekë dhe vaksinatorë të mundet që në një mënyrë të organizuar të vaksinojë nëpër shkolla.
Kjo për të patur edhe më tepër lehtësi për mësuesit dhe për të garantuar një monitorim të të gjithë procesit të vaksinimit dhe për të vaksinuar një kategori më të riskuar për arsye të punës që bëjnë dhe që meriton të ketë këtë përparësi në mënyrë që të vijojë dhe me lehtësimin e masave dhe rikthimin në shkollave”, shtoi Manastirliu
Manastirliu theksoi se në komitetin Kombëtar të Imunizimit u vendos vijimi i vaksinimit me AstraZeneca.
