Seanca e së hënës në parlament nuk do të ketë aksion vetëm brenda parlamentit. Jashtë tij në hyrje të ndërtesës demokratët kanë lajmëruar një tubim me mbështetës në orën 17 kur dhe është lajmëruar nisja e punimeve. Kundërshtimi i masës së arrestit në shtëpi të Sali Berishës, por edhe dënimi i 19 deputetëve për të mos marrë pjesë në seancat e kuvendit dhe në komisione do të jenë moto e reagimit të opozitës Ndërkaq edhe Partia e Lirisë tashmë ka nisur takimet me mbështetësit në rrethe.
Ilir Meta është ndalur në Korçë ku theksoi se vendi po përballet me një projekt të mirë-planifikuar prej kohësh për asgjësimin e pluralizmit politik. Çështja e incineratorëve, por edhe të koncesioneve të tjera sipas tij janë tregues i korrupsionit.Ndërkaq selia blu ka deklaruar se do të shtrijë aksionin në të gjithë vendin dhe për këtë organizim ka emëruar katër koordinatorë.
