Flotilja humanitare në të cilën ndodheshin aktivisti vlonjat Baki Goxhaj, por edhe persona të tjerë u rrëmbye nga ushtria izraelite. Baki Goxhaj tregon për ato ditë të tmerrit të përjetuara prej tij. Sipas Goxhajt, personat të cilët ndodheshin në flotilje u lidhën, u varën me kokë poshtë dhe u dhunuan për ditë me radhë në kampet e ushtrisë izraelite. Goxhaj tregon se ky ka qenë një nga momentet më të vështira të jetës së tij.
“Në mëngjesin e natës së parë në det, në ujëra ndërkombëtarë, pamë një anije të madhe në horizont dhe dy skafe që u drejtuan drejt nesh. U përpoqëm të largoheshim, por nuk mundëm sepse skafet ishin shumë të shpejtë. Na ndaluan, hipën në varkë, na lidhën dhe na kanë çuar te një anije e madhe që ishte e sajuar si burg me kontejnerë ku kemi qëndruar për dy ditë dhe dy net derisa kemi arritur brigjet e shtetit zionist”, rrëfen ai.
Goxhaj tregon se qëllimi i misionit të tyre ka qenë humanitar për të krijuar një korridor ku mund të dërgonin në Gaza ndihma të cilat shpëtonin jetë njerëzish. “Qëllimi i gjithë misionit të flotilës është krijimi i një korridori humanitar drejt Gazës, sepse Gaza është në bllokadë dhe ushqimet dhe medikamentet që hyjnë aty janë minimale”, tregon ai.
Sipas aktivistit Baki Goxhaj, ushtria izraelite nuk donte që kjo të ndodhte duke kërkuar që ndaj Palestinës të vazhdonte gjenocidin. Ndaj e vetmja përgjigje ndaj aktivistëve ishte dhuna. “Keqtrajtimi ka qenë konstant. Dhuna ishte fjala me të cilin ushtarët izraelit komunikonin me ne”, tregon ai.
Baki Goxhaj tregon se kjo gjë nuk e ka stepur dhe nëse do të jetë nevoja do të marrë sërish pjesë në misione humanitare. “Megjithatë, nëse misione të tjera do ketë, unë sigurisht që mund të kem përsëri interes. Nuk jam stepur aspak”.
Aktivistët humanitarë, por edhe ekipi i flotiljes që u morën peng, u liruan disa ditë pas rrëmbimit të tyre, falë dhe bashkëbisedimeve dhe ndërhyrjes së qeverisë shqiptare. Por dhuna dhe ato çfarë përjetuan do të mbesin gjatë në kujtimet e tyre si ditët më të vështira të jetës.
