Përballë mungesës së fuqisë punëtore vendase, bizneset shqiptare po marrin gjithnjë e më shumë punonjës të huaj, kryesisht nga Filipinet, India dhe Egjipti. Por nga ana tjetër, Shqipëria ka të regjistruar si punëkërkues 68 mijë persona, ku një pjesë e konsiderueshme janë edhe me arsim të lartë.
Në kohën kur bizneset shqiptare po përballen me mungesën në rritje të fuqisë punëtore vendase, tregu i punës po flet gjithnjë e më shumë në ‘gjuhë të huaj’.
Vetëm gjatë vitit 2025, rreth 18,156 shtetas të huaj kanë marrë leje pune në Shqipëri, prej të cilave 14.338 ishin miratime për herë të parë. Ritmin më të lartë të aplikimeve e udhëheqin Filipinet, India, Egjipti, Turqia, Italia dhe Maynmari, vende që po furnizojnë sipërmarrjen shqiptare me fuqi punëtore.
PUNONJËS TË HUAJ SIPAS SHTETEVE
Filipine 18%
India 18%
Egjipti 15%
Turqia 9%
Italia 4%
Maynmar 4%
Nga kuzhinat e restoranteve te kantieret e ndërtimit, punonjësit aziatikë po kthehen në “hallkën” që mban në lëvizje sektorë të tërë të ekonomisë. Referuar shifrave të 2025-ës aktivitetet ekonomike me numrin me të lartë të lejeve të aprovuara rezultojnë industria përpunuese, aktivitete të tjera shërbimi, akomodimi dhe shërbimi ushqimor, ndërtimi dhe tregtia.
KU PUNOJNË TË HUAJT?
Industria përpunuese 18%
Aktivitete shërbimi 18%
Akomodim, shërbim ushqimor 15%
Ndërtimi 15%
Tregtia 11%
Vetëm gjatë vitit të kaluar gati 9700 biznese hapën rreth 68. 860 vende të lira pune afro 12% më shumë se në 2024-ën, 31% e të cilave në rajonin e Tiranës, e pjesa tjetër e përqendruar më së shumti në bregdet Durrës, Vlorë apo edhe Fier.
Biznesi shqiptar kërkon më shumë zanatçinj sesa punonjës të kualifikuar. Sipas Agjencisë Kombëtare të Punësimit dhe Aftësive 29.9% e vendeve të lira të punës janë për profesione elementare, ndjekur nga zejtarët dhe zanatçinjtë me 23.7%, punonjësit e shitjeve e deri tek specialistë arsimi apo teknikë e nëpunës. Ndërsa aktualisht janë 6451 vende të lira pune për profesione dhe zanate të ndryshme.
KATEGORITË ME VENDE TË LIRA PUNE
Profesione elementare 29.9%
Zejtarë dhe zanatçinjtë 23.7%
Punonjës të shitjeve/ shërbimeve 15.9%
Punonjës në industri 10.5%
Specialistë me arsim të lartë 6.4%
Teknikë/specialistë të mesëm 5.3%
Nëpunës 5.3%
Por, në punësim vijon paradoksi, aq sa ka vende të lira pune po kaq janë edhe persona që kërkon punësim. Rreth 68.204 individë rezultojnë të regjistruar si punëkërkues pranë zyrave të punës, nga të cilët 38,097 persona janë pa arsim ose deri 9 vjeçar, kurse 30,108 janë me arsim të lartë e deri me master shkencor
