Kryebashkiaku i Vaut të Dejës, Mark Babani ka dorëzuar shenjat e gishtërinjve, pas akuzave të bëra nga PD-ja se ka qenë i arrestuar në Itali për vjedhje makinash në 4 prill të vitit 1994.
Një lajm i tillë është konfirmuar nga Babani për Report TV. Kërkesa i është nisur me postë Babanit ditën e sotme, i cili ka dhënë shenjat e gishtave në Prokurorinë e Përgjithshme. Më pas kjo e fundit do i dorëzojë të dhënat pranë Njësisë së Dekriminalizimit.
Dy identitetet e tjera për të cilat PD ka kërkuar të dhëna, janë Mark Babani i ditëlindjes 08/01/1967, për të cilin nuk rezulton asnjë vepër penale; dhe Mark Babani i ditëlindjes 24/12/1965, një vit lindje ky në të cilin kryebashkiaku i Vaut të Dejës ende nuk kishte lindur! Në një reagim që ka pasur më herët ,kryetari i Bashkisë së Vaut të Dejës, u shpreh se ai ka lindur më 24 dhjetorit të vitit 1966, por duke marrë parasysh kohën dhe vonesat për të bërë regjistrimet në vendet e caktuara, i është shënuar ditëlindja më 1 janar 1967, ditën kur prindërit e tij janë paraqitur në gjendje civile.
Ky është rasti i tretë i kryebashkiakëve socialist që akuzohet nga PD, pas Valdrin Pjetrit në Shkodër dhe Agim Kajmakut në Vorë.
