Gripi i shpendëve dyshohet se ka prekur pularitë e mëdha në Durrës. Më shumë se 500 mijë pula kanë ngordhur ditët e fundit, duke shkaktuar panik për përhapjen e gripit të shpendëve.
Tre prej kompanive më të mëdha në qytetin bregdetar iu kanë ngordhur të gjitha pulat.
Deri tani analizat thonë se kemi të bëjmë me sëmundjen e laringotrakeit infektiv. Nuk është ende e qartë se cili variant i virusit po qarkullon, por dyshohet se po dëmton rrugët e frymëmarrjes së shpendëve.
Disa ditë më parë ka qenë i ftuar në ABC Live Drejtori i Zonave të Mbrojtura në Korçë, Iljon Thanasi i cili ka dhënë detaje në lidhje me përhapjen e gripit të shpendëve në Prespë në anën Greke.
Thanasi tha se deri më 10 mars te ne nuk ishte konfirmuar asnjë rast i pelikanëve të sëmurë apo shpendëve të tjerë.
Por në rast se do të ndodhte ai tha se jemi të rrezikuar dhe se banorët duhet që të bëjnë kujdes.
Ai u ka bërë thirrje qytetarëve që të mos prekin me dorë asnjë shpend të ngordhur që mund të shikojnë në liqen, por të njoftojnë menjëherë autoritetet përkatëse.
