Kryeministri Rama deklaroi mbrëmë në një emision televiziv se Shtetet e Bashkuara kanë një borxh për të larë me Shqipërinë, lidhur me strehimin e opozitës iraniane (MEK) në kampin që ndodhet në Manëz.
“Ne nuk është puna se bëmë një gjest ndaj Amerikës. Ne jemi sot më të mbrojtur se kurrë sepse jemi aleatë të SHBA dhe anëtarë të NATO-s. Flas nga pikëpamja e çdo lloj agresori të imagjinueshëm apo jo. Kur ne mund të jemi të vlefshëm duke marrë përsipër një operacion të caktuar, nuk kemi asnjë mundësi. Jo se mund të mos e bëjmë, por s’kemi asnjë mundësi të refuzojmë nëse duam të jemi të vlefshëm. Është e vërtetë që ka njerëz që thonë po ç’na duhet, pse i morëm.
Aleancat nuk janë menu që të pëlqen të marrësh pjatën e parë dhe jo të dytën. Ke detyrimet e tua dhe momentet kur e bën veten të vlefshëm për aleatët e tu më të mëdhenj. Ne ofrojmë shtëpinë tonë, ata duhet të garantojnë jetesën e tyre dhe ju duhet të garantoni sigurinë. Sot është e qartë se ne kemi bërë tonën, ata kanë mbajtur veten ndërsa aleatët tanë kanë një borxh për të larë me ne”, – tha Rama.
Pas kësaj deklarate ka ardhur përgjigjia e Lulzim Bashës, i cili ishte zhdukur nga “qarkullimi” prej shumë muajsh, duke mos bërë reagime publike, apo në rrjetet sociale. Ish-kryetari i Partisë Demokratike Lulzim Basha, prishi gjumin e natës dhe bëri mbrëmë në mesnatë dy komente në Twitter për deklaratat e Ramës.
“Aleatët tanë strategjikë SHBA nuk kanë asnjë borxh ndaj nesh, ndërsa ne nuk lajmë dot kurrë borxhin ndaj tyre për Shqipërinë e pavarur, të çliruar nga komunizmi dhe në NATO, për çlirimin dhe pavarësinë e Kosovës dhe për të drejtat e shqiptarëve në RMV e kudo.
Shteti i së drejtës me barazi para ligjit për të gjithë, demokracia funksionale dhe media e lirë, konkurrenca e ndershme dhe liria e tregut, lufta kundër korrupsionit dhe krimit të organizuar janë standardet ende të paplotësuara të partneritetit dhe aleancës strategjike mes Shqipërisë, SHBA-së dhe BE-së”–shkroi Basha.TPZ
