Qendra Spitalore Universitare “Nënë Tereza” përmes një komunikimi të nëndrejtoreshës së QSUT, dr. Arjana Strakosha bën me dije se është gati pavijoni i tretë në spitalin Covid3. Ndërkohë që mëngjesin e sotëm tek spitali “Shefqet Ndroqi” ose Covid-2 janë shfaqur autoambulanca që rrinin në pritje me të sëmurë, QSUT deklaron se kapacitetet nuk janë ezauruar, duke treguar pamjet nga Covid-3. Sipas mjekes Strakosha alarmi se nuk ka kapacitete është i pavërtetë.
“Jemi pranë spitalit Covid 3, në pavijonin e tretë. Sikurse e shihni kemi kapacitete shtretërish të lirë për tu shërbyer qytetarëve. Në gjendje të gatshme. Alarmi që janë pakësuar kapacitete spitalore nuk është i vërtetë, sikurse e shikoni edhe vetë janë gati shtretërit në pritje të të sëmurëve. Në skenarët e parashikuar janë është në gjendje edhe Covid 4, pasi të mbushen të gjithë kapacitet”, u shpreh ajo.
Dr. Arjana Strakosha shpjegon se në skenarët e parashikuar, në gjendje për të pritur të sëmurët është dhe Covid-4. pasi të mbushen gjithë kapacitetet e Covid1, Covid2 dhe Covid3. Strakosha ka bërë një apel për qytetarët për të respektuar rregullat e vendosura për të shmangur fluksin në spitale dhe për ta përballuar sa më lehtë fluksin e pacientëv.
“Nga na tjetër për të eleminuar pikërisht dyndjen të sëmureve drejt spitaleve, u bëj edhe njëherë thirrje qytetarëve të zbatojnë me rigorozitet rregullat. Nuk është sëmundje e lehtë. Nuk është shaka. Duhet ruajtur distancimi, duhe të evitohen festat, duhet të evitohen baret, duhet të evitohen ditëlindjet, pra shumë gjëra që tashmë i dimë. Në këtë mënyrë, ne të gjithë luftojmë sëmundjen, edhe e përballojmë akoma më lehtë, pikërisht edhe fluksin e pacientëve të cilët kanë nevojë për hospitalizim”, apeloi ajo.
Pavioni i tretë i spitalit Covid3 ka një kapacitet 50 shtretër ndërsa totali i shtretërve në spitalin Covid-3 është 150. Në total në 4 spitalet Covid janë 550 shtretër. Sipas strategjisë së vjeshtë dimrit të hartuar nga Komiteti Teknik i Ekspertëve, është parashikuar dhe hapja e disa spitaleve rajonale për trajtimin e pacientëve Covid, nëse do të jetë e nevojshme, duke konsideruar dinamikën e situatës.
