Edhe në mbrëmje ka qenë mjaft e tensionuar situata në banesën tek “Petro Nini” në Tiranë.
Edhe pse përmbaruesit dhe forcat policore janë larguar, banorët shprehen të frikësuar se ata mund të rikthehen gjatë natës.
Një ndër banorët që u shoqërua në komisariatin numër 2 dhe u lirua në mbrëmje, foli për Ora News.
Banori u shpreh:
“Mua më shoqëruan se po thoja për këtë zonjën këtu që lëreni të mbrojë shtëpinë. Kaq. Kjo është taktika që përdori policia për të pakësuar rezistencën këtu. Kjo është filozofia, të heqim atë që reziston më fort. Na mbajtën 10 orë.Përmbaruesi kishte thënë se kërcënuam përmbaruesin me veze, si mund ta kërcënoj unë jam 60 kg, ai 90?”
Mbi ngjarjen:
IKMT ka shkuar të prishë banesën e dy familjeve Llapaj dhe Dervishi në rrugën “Sami Frashëri”, përballë Fondit Shqiptar të Zhvillimit, në Tiranë.
Dy familjet Llapaj dhe Dervishi, prej 22 vitesh janë sorollatur nëpër gjyqe, pasi pronën që e kanë blerë në 1993, por që kanë jetuar aty që prej 1953, po kërkon t’ua marri ish-pronari.
