Shënojeni këtë emër: Memfis Depaj. Është sulmuesi i përzgjedhur nga Ronald Kuman për skuadrën e Barcelonës. Sipas “RAC1”, sulmuesi holandez (26 vjeç) shihet si lojtari ideal për të zëvendësuar Luis Suarezin.
Uruguaiani është në listën e largimeve, por nuk dëshiron që t’i braktisë katalanasit. Por Kuman do të ketë shumë peshë në merkato sepse kjo ishte një nga kërkesat që ai kishte për drejtuesit e Barcelonës përpara se të hidhte firmën në kontratë për të nisur projektin e ri.
Memfis Depaj aktualisht është lojtar i Lionit dhe njihet për shpejtësinë e tij dhe për forcën fizike. Bëhet fjalë për një lojtar polivalent, që përveçse mund të luajë në rolin e numrit 9, mund të luajë shumë mirë edhe nga krahët.
Memfis ka shënuar 9 gola në 13 ndeshje të luajtura në kampionatin francez. Ai u aktivizua shumë pak prej dëmtimit, por edhe prej pezullimit të këtij kampionati.
Në Ligën e Kampioneve arriti që të realizonte 6 gola. Për më tepër, do të jetë një objektiv më lehtësisht i arritshëm sesa Lautaro Martinez, i cili është i pari në listën e dëshirave për drejtuesit e Barcelonës. Depaj mund të kushtojë 40 milionë euro.
