Kryetari i PD-së, Lulzim Basha, e ka nisur konferencën e shtypit sot me një denoncim për atë që po ndodh në parlament, ku Manastirliu po justifikon vendimet e qeverisë për Covid 19. Basha tha se qeveria ka gënjyer dhe për numrin e víktimave të Covid, një pjesë e të cilëve mbahet i fshehtë.
“Dua të dënoj maskaradën e ministres së Shëndetësisë në këto momente në Kuvend, që po mundohet të mbulojë dështimin e Edi Ramës”, u shpreh Basha. “E vërteta e shifrave të të infektuarve është fshehur dhe unë kam disa fakte nga rrethi i gjërë familjar. Po gënjejnë për numrin e vërtetë të víktimave dhe të personave të infektuar. Përmasat e vërteta të infeksionit po mbahet e fshehtë sepse Rama ka humbur kontrollin e menaxhimit të pandemisë.
Mungesa e kapaciteteve testuese, të infektuarit duhet të presin deri në 6 ditë për të bërë testin. Kështu, numri i të infektuarve mbahet artificialisht i ulët dhe përmasa e sëmundjes mbahet e fshehtë. Kur u thuhet e vërteta, fshihen pas sakrificës së mjekëve për të mos u përballur me të vërtetën. Rama dhe Manastirliu po fshihen pas sakrificës së mjekëve. Numri i lartë i infeksioneve dhe víktimave është pasojë e dështimit të qëllimshëm të Ramës.
Vetëm dje, nga theasari i janë dhënë 565 mijë euro máfias së plehrave. Kjo shumë parash ëahtë baraz me 14 mijë tamponë. Gjithë qyteti i Durrësit me 15 tamponë në dispozicion, 60 kërkesa për testim. Shqipëria renditet e fundit në Europë për numrin e testimeve”, u shpreh Basha. “Ai e ka ndarë mendjen që këtu të bëhet kërdia, për të mbushur xhepat e klientëve të tij, duke plaçkitur xhepat e shqiptarëve. Ky është terrorizëm shëndetësor, po të kishte drejtësi funksionale, kjo do ishte shpërdorimi më i tmerrshëm i detyrës që mund të bëjë një kryeministër”, tha më tej Basha.
“Prej 5 javësh e kemi paralajmëruar, i kemi kërkuar të shtojë testimet, të japë bonuset për mjekët dhe infermierët. Prej 4 javësh i kërkojmë të rimbursojë paketën e trajtimit të COVID për të sëmurët në shtëpitë e tyre. Fondi i mjaftueshëm për 14 mijë tamponë i është paguar dje biznesit të plehrave.
Jemi në humnerë. Çdo jetë e humbur e ngarkon me përgjegjësi penale Edi Ramën. Nëse do të kisha një instrument për ta fshirë nga karrigja, do ta kisha bërë sot. Por instrumenti i vetëm që kemi për ta rrëzuar Edi Ramën nga karrigja është 25 prilli. I bëj thirrje prokurorisë të hapë hetimet për abuzimet e të babëziturve që po pasurohen mbi fatkeqësinë”, u shpreh më tej Basha në konferencën me gazetarët.
