Blendi Klosi, ministër i Turizmit dhe Mjedisit, ka qenë i ftuar në emisionin “Të Paekspozuarit” në MCN TV. Ai ka thënë se cilësia e ujit në vijën bregdetare të Shqipërisë është e “shkëlqyer” në 89% të saj dhe se kemi impante të ujrave të zeza në shumë zona. “Për ujrat e zeza, meqenëse u ngrit si shqetësim. Shqipëris sot, sipas vlerësimit të agjensisë europiane të ujit, 89% e ujit në Shqipëri është e shkëlqyer. E gjithë vija bregdetare ka impiante trajtimi të ujrave të zeza. Kemi dokumenta zyrtare“, tha Klosi.
Ministri deklaroi se në Shqipëri kanë ardhur 15 marka të njohura ndërkombëtare të hoteleve. “Janë bërë shumë vepra që shkojnë në ndihmë të turizmit. Ne sot mund të flasim për një industri të mirëfilltë, që është industria e turizmit. Gjërat ecin me shpejtësi, duhet të themi ku është realiteti i sotëm.
Para pak vitesh, një nga problematikat ishte futja e hoteleve me pesë yje, sot mund të themi se kemi mbi 15 kontrata të nënshkruara, brande (marka) të menaxhuara. Kemi një hotel “Melia”, në Gjirin e Lalëzit. Në Tiranë ka një sërë brande. Kemi sot mbi 15 kompani apo marka të çertifikuara, që kanë përfunduar hotele në Shqipëri. Pastaj kemi shumë investime nga investitorë shqiptarë në hoteleri. Duhet të kemi parasysh, na duket sikur e kemi bregdetin e madh, por kemi 400 kilometër vijë bregdetare. Sot shfrytëzojmë vetëm 18% të saj. Nuk kemi më profilin e tokës së xanun, por çdo gjë është me leje“, tha Klosi.
