Pronarët e banesave dhe bizneseve të vendosura në krah të liqenit artificial të Tiranës, kanë denoncuar mbylljen e rrugës dytësore paralel me rrugën interurbane Tiranë-Elbasan nga nënkalimi i liqenit të thatë deri tek diga e parkut të liqenit. Sipas tyre urdhri i nxjerrë nga kryetari i bashkisë Erion Veliaj është tërësisht arbitrar dhe i shërben interesave të oligarkëve të cilët duan të ndërtojnë në këtë zonë.
“Një ditë na vjen një larmërim nga bashkia që thotë se do ta bllokojmë momentalisht rrugën sepse do të bëhet një maratonë. U bllokua rruga dhe pritëm disa ditë kur erdhi një letër nga bashkia me urdhër të kryetarit. Kjo zonë duhet të jetë e bllokuar. Përpara se të bllokohet, ne kemi pasur secili oferta nga biznesmenë të fuqishëm për të blerë pronat tona që kanë pasur refuzimin tonë.Llafet kanë qenë këto, ju nuk na i jepni por ne jua marrim pa dhënë edhe asnjë lekë. Fiks pas pak javësh ndodhi fakti se vinë nën petkun e shtetit ku tregohen interesat oligarkëve”.
Mbyllja e rrugës ka vënë në rrezik edhe jetën e fëmijëve që frekuentojnë terrenet sportive, të cilët hipin e zbresin nga makinat në rrugën interurbane kryesore, duke u bërë burim aksidenti.
“Ai ka bërë krim tek fëmija, sepse të gjithë ata fëmijë që vijnë në terrenet sportive ikin në këmbë ose i pret prindi me makinë në autostradë duke u bërë kështu burim aksidenti. Fëmija kapërcen autostradën për të shkuar në makinë”.
Urdhri i kryebashkiakut Veliaj nuk është konsultuar me pronarët dhe bizneset që preken në mënyrë të drejtëpërdrejtë prej tij, duke i bërë këta të fundit t`i drejtohen edhe gjykatës.
