Ish-presidenti George W. Bush, si një republikan, pohoi se e ka thirrur Joe Bidenin për t’ia uruar fitoren. “Unë i dhashë urimet e mia të ngrohta dhe e falënderova për mesazhin patriotik që dha natën e kaluar”-tha Bush përmes një deklaratë për media
“Unë gjithashtu e thirra Kamala Harrisin për ta uruar për zgjedhjen e saj historike në pozitën e nënpresidentës. Megjithëse kemi dallime politike, unë e njoh Joe Bidenin si një njeri të mirë, i cili ka fituar mundësinë për të udhëhequr dhe bashkuar vendin tonë.
Presidenti i zgjedhur përsëriti se edhe pse kandidoi si demokrat, ai do të punojë për të gjitë amerikanët. Unë i ofrova të njëjtën gjë edhe presidentëve Trump dhe Obama: lutjet e mia për suksesin dhe zotimin tim për të ndihmuar në çdo mënyrë që mundem”.
Bush tha se gjithashtu e përgëzoi presidentin Trump për fushatën që zhvilloi gjatë zgjedhjeve presidenciale.
“Dua ta përgëzoj presidentin Trump dhe mbështetësit e tij për fushatën. Ai fitoi votat e më shumë se 70 milionë amerikanëve – një arritje e jashtëzakonshme politike. Ata kanë folur dhe zërat e tyre do të vazhdojnë të dëgjohen përmes republikanëve të zgjedhur në çdo nivel të qeverisjes”- tha ai.
