Ministri i Shtetit për Diasporën, Pandeli Majko mori pjesë dje në ceremoninë festive të 28 Nëntorit në komunitetin arbëresh në qytetin Maschito, në Itali.
Gjatë kësaj vizite ministri është shoqëruar nga kryetarja e bashkisë së Maschitos, Rossana Musacchio Adorisio.
Ministri i Shtetit për Diasporën në fjalën e tij përshëndetëse, theksoi edhe një herë rëndësinë e të qenit të bashkuar nëpërmjet gjuhës dhe traditave shqiptare.
“Jemi shumë, të shpërndarë nëpër botë, kudo, në Australi, Amerikë, Alaskë, Ukrahinë, etj dhe është shumë e rëndësishme që të vazhdojmë t’i mësojmë brezit të ri gjuhën shqipe, kulturën dhe traditat e vendit tonë”, – tha Majko.
Ndërsa kryebashkiakja e Maschitos, theksoi edhe një herë krenarinë e këtij komunitetit për origjinën e tij shqiptare dhe lidhjen e fortë që ruajnë me figurën Gjergj Kastriot Skënderbeut.
Aktiviteti më i rëndësishëm i kësaj vizite ishte inaugurimi i bustit të “Gjergj Kastriot Skënderbeut”, krijim i skulptorit shqiptar Vladimir Llakaj dhuruar komunitetit të Maschitos nga ministri i Shtetit për Diasporën.
Busti i vendosur në sheshin “San Francesco” do të jetë gjithmonë një shenjë krenarie për prejardhjen e këtij komunitetit.
