Dëbora e parë e sezonit ka bllokuar një pjesë të Spanjës veriore. I ftohti polar që ka përfshirë një pjesë të madhe të vendit parashikohet të zgjasë deri ditën e Diel. Kështu, në rajonet veriore të Spanjës, si në Galicia, Asturia apo Castilla dëbora ka arritur trashësinë e 30 cm, ndërkohë që autoritetet kanë lëshuar alarmin e kuq dhe portokalli. Dëborë ka rënë edhe në disa zona të provincës së Valencias.
Ditën e Shtunë temperatura kanë zbritur deri në 4 gradë celsius në zonën e Costa Blanca. Me fillimin e javës situata pritet të ndryshojë, me temperaturat në ngritje dhe dëborën vetëm në zonat malore. Erërat e forta shoqërojnë stuhinë e fuqishme që ka goditur vendin. Në brigjet veriperëndimore dallgët vlerësohen deri në 10 metra të larta.
Disa shkolla në rajonet veriore të Spanjës janë mbyllur si pasojë e dëborës dhe erërave të forta. Nga ana tjetër, kushtet mjaft të vështira atmosferike kanë shkaktuar probleme serioze edhe në qarkullim rrugor.
