Lideri i opozitës Lulzim Basha ka prezantuar sot programin për mirëqenien sociale. Basha përmendi angazhimet kryesore, ku më e rëndësishmja sipas kryedemokratit është rritja e pensionit dy herë më shumë se norma e inflacionit dhe të paktën 5% në vit. Kreu i PD deklaroi se do të dyfishohet asistenca ekonomike për të gjitha familjet në nevojë. “Unë angazhohem për rritjen e pensioneve për 650 000 pensionistët shqiptarë, dy herë më shumë se norma e inflacionit dhe të paktën 5% në vit! Ne nuk do t’i braktisim kurrë pensionistët tanë, që i dhanë kaq shumë vendit tonë të mrekullueshëm dhe familjeve tona.
Angazhohem të dyfishojmë menjëherë asistencën ekonomike për të gjitha familjet në nevojë. Nën qeverisjen tonë, askush nuk do të braktiset, shpërfillet dhe nëpërkëmbet”, tha ndër të tjera Basha. Një tjetër angazhim i kreut të PD është ndihma për personat me aftësi të kufizuara. “Angazhohem që njerëzit me aftësi të kufizuara do të jenë pjesë reale e vendimmarrjes të qeverisjes tonë dhe jo thjesht përfitues pasivë apo viktima të indiferencës, përbuzjes apo korrupsionit qeveritar. Ata do të jenë pjesë e këshillimeve dhe vendimeve mbi hartimin dhe zbatimin e reformave sociale që kanë të bëjnë drejtpërdrejtë”, citoi Basha.
