Situata delikate te Napoli mund të sjellë pasoja edhe në kombëtaren shqiptare të futbollit. Përpos, Elseid Hysaj, i cili nuk po arrinë të gjej një fanellë titullari nën drejtimin e Carlo Ancelottit, kuqezinjtë mund të marrin një tjetër “thikë” pas shpine.
Sipas asaj që raportojnë mediat italiane, Edi Reja ka përfunduar në listën e dëshirave të Aurelio de Laurentiis. Numri 1 i napoletanëve ka simpati për 74-vjeçarin, i cili në të shkuarën i ka drejtuar jugorët, duke i ngjitur edhe në Seria A. Aktualisht, Reja është pa kontratë, pasi në nëntor i skadoi kontrata me kuqezinjtë. Megjithatë, në krye të listës së De Laurentiis gjendet ish tekniku i Milanit, Gennaro Gattuso dhe vështirë se Reja do të ulet në pankinën e Napolit.
Gjithsesi, hipotezat janë dhe orët e ardhshme pritet të jenë vendimtare për të ardhmen e teknikut italian të Shqipërisë. Zëra jo të konfirmuar pohojnë nën zë se Reja ka firmosur kontratë 4-vjeçare me Federatën Shqiptare të Futbollit, por një gjë e tillë nuk është konfirmuar deri më tani nga Institucioni më i lartë i futbollit në vend.
